குடைக்குள் மழை

மழையில் குடையோடு நானும்

வழியில் மழையோடு நீயும்

ஓடி வந்து

உள்ளே புகுந்து

இடம் பிடித்தாய்

குடைக்குள் கொஞ்சம்

குமரிக்குள் மிச்சம்

வெறித்த பின்பும்

நனைத்த படியே

குடையிலிருந்து வழிகிறது

"காதல்"

ஒரு பட்டாம்பூச்சி நெஞ்சுக்குள்ளே..

என் கைகளுக்குள்

கை வைத்து

பிடித்து வைத்த

பட்டாம்பூச்சியைப்

பக்குவமாகத் தருகிறாய்

உற்றுப் பார்க்க

விரல்களை விலக்குகையில்

முட்டி மோதிப் பறந்து

செல்கிறது..

கைகளுக்குள்ளிருந்து

"காதல்"

நான் உன்னைக் காதலிக்கவில்லை

'ஏன் என்னைக் காதலித்துக்
கொல்கிறாய்'
என்ற
சாகடிக்கும் உன் கேள்விக்குச்
சவுக்கடியாய்
இந்தக் கவிதை.

என் பேனாவும் பேப்பரும்
தாம் கொண்ட
காதலுக்கு 'மை' ஊற்றியது
நம் காதலை.

நாயகனைத் தேடிய
என் காதல் கனவுகளிடம்
கைதானவன் நீ.

கணக்குப் பாடத்தில்
கைவிட்ட மதிப்பெண்ணுக்கு
காரணம் காட்டப்பட்டது
நீயும் நம் காதலும்.

காதலர் தினமன்று
தோட்டத்து ரோஜாக்கள்
கைகாட்டின
உன்னை.

வயதுப்பையன் என
எனக்கு நீயும்
வயதுக்கு வந்த பெண்ணென
உனக்கு நானும்
வேறு வழி இல்லாமல்.

வயதுகள் கொண்ட
வாலிப ஆசைகளுக்கு
வடிகாலானது
நம் காதல்.

இதற்கு மேல்
சொல்லிக்கொள்ள
உன்னிடம் எனக்குக்
காதலுமில்லை
கத்திரிக்காயுமில்லை..